हवा
सैर में रोळो माचियोङो हो । आम आदमी रो मिनखपणो सांप्रदायिकता रै बदळतै मोल धकै डाफाचूक । बांथमबांथ दोनूं कौमां मुजब ओ रोळो राजनैतिक पैंतरबाजी हो । जीवण री गति रोज दांई थिर ढाळै ही ।
राज ‘शांति थापना सारू कर्फ्यू रो ऐलान कर दियो । प्रशासन रो मानणो हो कै हिन्दू-मुसलमान दोनूं कौम ऐक-बिजै री खून री तिरसाई होयगी ही ।
कर्फ्यू रै ऐलान सूं जनता नैं भी मामलै री गंहराई रो ठा पङ्यो अर उण रै काळजै ई सावचेती री बात ऊकली ।
राम अर रहीम पाङौसी तो हा ही, बाळगोठिया संगळिया भी हा । वां रै बिच्चै कदैई जाति-बिरादरी नीं आई पण आज रो ओ कफ्र्यू वांरै मीतपणै अर सम्बन्धां नैं ई कुरेद न्हाख्या । दोवां नै ई बैम कै दूजोङो अपणायत रो नाटक कर उण नैं ठिकाणै लगावणैं री फिराक में है । कोई किण रो ई नुकसान नीं कर्यो पण दंगै री हवा धकै दोनूं मना-गनां एक-दूजै रा दुस्मीं बणग्या ।
रोळै मांय मर्ये मिनखां री खबर सुण दोवां नैं ई लाग्यो कै वांरी जान सुरक्षित नीं है । आपरी रिच्छा वास्तै दोनूं ई हथियार खरीद लिया । हथियार कनैं होवण सूं बै कीं निरभै होया ।
दोवां री मौन अणबण वांरै बिच्चै पसरती रैयी अर बै एक-दूजै सूं अळगा-दर-अळगा होंवता गया ।
एक ठण्डी रात नैं ‘हवाई फायर’ हुयो । दोनूं खतरो जाण हथियार सांभ लिया । दोनूं ई आ ई मानै कै ओ दूजोङै रो काम है ।
दोनूं गुत्थमगुत्था । एक-दूजै रा खून रा तिरसाया । पण उणी बगत नेताजी वठै आव पूग्या । दोवां नैं समझांवतां थकां अळगा कर्या अर मुळकता अंधेरै में गमग्या ।
वठै रै रैवास्यां री राय में नेताजी स्याणा-सुळझयोङा हा पण आ कोई नीं विचारै कै कर्फ्यू रै बावजूद बै वठै रात नैं कांई करता ?
Û
कोई टिप्पणी नहीं:
एक टिप्पणी भेजें