सोमवार, 28 मार्च 2011

‘आज रो राजस्थानी साहित्य अर छीजती संवेदना


अबार १२ अर १३ मार्च २०११ नै राजस्थानी भाषा, साहित्य अर संस्कृति अकादमी, बीकानेर अर प्रग्य़ालय संस्थान, बीकानेर रै भैळप मांय ‘आज रो राजस्थानी साहित्य अर छीजती संवेदना (बीकानेर सम्भाग रै संदर्भ में)‘ आयोजित हुयो ! ओ सम्मेलन पैली २६-२७ फ़रवरी नै होवणो हो ! भाई श्री कमल रंगा म्हनैं  ‘इक्कीसवैं सईकै री राजस्थानी कविता अर छीजती संवेदना (बीकानेर सम्भाग रै संदर्भ में)’ विषय माथै परचै रो काम सूंप्यो !  म्हैं १२ मार्च नैं किणी दूजै कार्यक्रम में हामळ कर राखी ही ! अबै दिक्कत आ ही कै कमलजी मानै ई नीं ! वांरो केवणो हो कै म्हैं दूजै कार्यक्रम जिको तीन बज्यां हो, तांणी फ़्री हुय जावूंला पण म्हनैं इण में बैम हो ! छेवट म्है सोच्यो कै क्यूं नी कमलजी रै नांव कागद लिख देवूं ! मौको लागसी तो पढ देस्यूं, नीतर कमलजी बांच दैयसी ! म्हारै इण तरीकै नै सम्भागियां पसंद करयो ! वगत री संकडायत धकै ओ मत्तै ई एक नूंवो प्रयोग हुयग्यो ! ओ मूळ कागद आपरी निजर है !
००
मानजोग मंच नै म्हारो वंदन अर आप सगळा हाजिर-नाजिर  ग्यानी-ध्यानी संभागियां नै सादर  जथाजोग ।
म्हैं रवि पुरोहित हाजिर हूं  ‘इक्कीसवैं सईकै री राजस्थानी कविता अर छीजती संवेदना (बीकानेर सम्भाग रै संदर्भ में)’ रो जातरा-वृतांत लैय नै आप गुणीजनां री इण ग्यान गोठ में । इण जातरा में आपां आमीं-सांमी हुयस्यां  मन री जागती जीवन जोत सूं, दैसूंटै री पीड़ सूं, गीता ग्यान अर इण री जोत उजास सूं, धंवर पछै रै सूरज सूं, रूई मांयली सूई सूं अर बात तो ही री कुचरण्यां सूं । सागै ई आपां मिलस्यां मरूधर म्हारै देश सूं, मुट्ठी भर उजियाळै रै पळकै सूं, वगत रै वैग सूं, डाण्डी सूं अणजाण बोलती सुरतां नै ओस री बूंदां रै गुलदस्तै सूं । इण जातरा में आपां बंतळ करस्यां बीनणी रै परवानै सूं, मीरां रै उजास भरियै सुपनां सूं, चिड़ी री बोली लिखतै सोनल बैळू रै समदर, धोरां-धोरां पाळां-पाळां चालती रेख री चिड़पड़ाट सूं । बीकानेर सम्भाग री राजस्थानी कविता री इण जूंण जातरा में आपां रूबरू हुयस्यां  महाराणा प्रताप रै प्रताप सूं, आंख्यां देख्यै साच री पंचलड़ी सूं अर सुण ले भाईला आंख भर चितराम रै हेत रै हेलै सूं । इण विचार गेलै में ढूंढस्यां म्हारै पांती री चिंतावां, तिरस री तासीर अर आं सूं बचाव सारू ल्यावस्यां संजीवणी ।
आं सब सूं पैली म्हैं अेक बात साफ करनो चावूंला कै म्हनैं भाई कमलजी रंगा रै आदेश मुजब छीजती संवेदना नै आधार बणा’र एक परचो आप सांमी राखणो है पण म्हैं माफी चावूंला । परचा तो देवी-देवतावां अर ग्यानी-ध्यानी ऋषि-मुनियां रा हुवै । म्हैं ठहरयो निरो मूढ बेअकल लोभी गृहस्थ । परचो देवणै री म्हारै मांय कुव्वत -सामरथ कै ऊरमा कठै ? म्हैं तो फगत सिरजण फूल रो भंवरो बणनो चावूं । सद्मूल्यां रो रसपान करणियो भंवरो । इण वास्तै म्हैं फगत कागद बांच सकूं । पत्र रूप । साहित्यिक पत्र री आपरी मर्यादावां, सीमावां, काण-कायदा हुवै पण म्हैं म्हारै इण पत्र नैं आं सब सूं पैली ही मुगत कर लैवणो   चावूं । क्यूं कै म्हैं जिण पत्र री बात कर रैयो हूं, इण रो कोई शास्त्रीय स्वरूप नीं है । ओ साव निजू नै अणगढ पत्र है । जियां कै एक सम्बन्धी रो दूजै सम्बन्धी नै, बाप रो बेटै नै कै भाई रो भाई नै कै पछै किणी नातै-रिश्तेदार कै यार-भाईलै नै लिख्यो जावण वाळो पत्र । इण वास्तै म्हारै इण पत्र नै साहित्यिक अर शास्त्रीय मानदण्डा अर नैम-कायदां सूं परै हट’र जे साव निजू पत्र रूप लेवोला तो म्हनैं अर आप सगळा नै रुचैला ।
इण कागद रो संदर्भ बो ई है -‘इक्कीसवैं सईकै री बीकानेर सम्भाग री राजस्थानी कविता मांय छीजती संवेदना री अंवेर ।’  अठै एक बात भळै म्हैं निवेदन करनो चावूंला कै बरस 2000 सूं लैय नै 2010 तांई बीकानेर सम्भाग रै कवियां री छपी थकी पोथियां जिकी म्हारी जाणकारी में है, वांरी संख्या ४३ सूं बत्ती बणै । हुय सकै कई पोथियां तांणी म्हैं अल्पज्ञ पूग ई नीं सक्यो होवूं । पोथ्यां री विगत कै कवियां रा नांव गिणावणा भी इण छोटै कागद में सम्भव नीं है । पण ओ भी भरोसो दिरावूं कै बै सगळा मौजीज कवि म्हारै काळजै में ठावी ठौड़ राखै ।
तो आपरी निजर है म्हारो ओ कागद जिको म्हैं लिख्यो है म्हनैं नूंतणिया अर इण सम्मेलन रा संयोजक भाई कमल रंगा रै नांव ।
आदरजोग भाई कमलजी,
राजी खुशी तो थे सदां रैवो ई हो, कीं नूंवा-नूंवा हुवोला । थांरी रळी हरमेस काळजै कूदड़का मारै । सम्मेलन री सफळता सारू आपनै आगूंच रंग । पण कमलजी, थे करी म्हारै मांय खोटी है । थे कैयो छीजती संवेदना पर परचो है । पण थे अेकर ई आ नीं बताई कै आ छीजती संवेदना किण री ? कवि री, कविता री कै पछै पाठकां रै मिस समाज री । खैर ! थे तो करी जिसी करी, म्हारो राम रूखाळो । कवि अर उण री कविता री छीजती संवेदना नै म्हैं छोड दिया है । क्यूं कै अठै म्हैं दोस्तोवस्की रै पख रो हामी हूं कै -‘सुन्दरता ई छेवट इण  दुनिया नैं बचावसी ।’ जद तांई जीवन में कोमळता अर रूप-सौंदर्य बचियोड़ो है तद तांई ई जीवन जीवन है । मानवीय संवेदना बिना साहित्य री जाण संभव नीं है । साहित्यकार होवणैं री पैली शर्त उण रो संवेदनशील होवणौ है । सादगी नैं असंवेदनशील बणावणों, भाखर सूं भाटा भांगणैं रै समचै ठा नीं कित्ता ई दवाब उण रै अवचेतन माथै पड़ै पण अेक रचनाकार तमाम अमानवीय, हिंसक अर डरपाऊ स्थितियां बिचाळै आपरो मारग ढूंढ लेवै ।’ इण दीठ म्हारी जातरा रेवै समाज री छीजती संवेदना रै  ओळै-दोळै ।
    मैक्सिम गोर्की रै संदर्भ सूं बात करां तो साहित्य में दो मूळ धारावां कै प्रवृत्तियां मानी जावै: अेक रोमांसवाद री नैं बिजी जथारथवाद री । अरथ री दीठ सूं जथारथवाद मिनख अर उण री जीवण स्थितियां रो इस्यो सांचो चितराम है जिकै माथै कोई रंग-रोगन नीं लगायोड़ो होवै । रोमांसवाद री कैई परिभासावां दिरीजी है पण ओजूं तांई कोई इसी ठीक-ठाक कै व्यापक परिभासा साम्हीं नीं आयी है कै जिण माथै सगळा साहित्यग्य अराय, अेकमत कै सन्तुष्ट होवै। रोमांसवाद में दो बिलकुल अलग-अलग नैं विरोधी प्रवृत्तियां में भेद होवणों चाहिजै । अेक धारा है थिर नैं निस्चेस्ट अर दूजी सक्रिय नैं क्रियाशील । थिर रोमांसवाद मिनख रै जीवन नैं रंग-रंग उण नैं सन्तुस्ट करणैं धकै मिनख रो ध्यान आसै-पासै री दुनियां सूं हटावणै री कोसिस करतां थकां अंतस मन री अंवळायां रै जंगळ में निस्फळ आत्मदरसण कै जीवण री अबूझ आडियां जियां कै प्रेम, मिरत्यू अर बीजी अणचींती निराकार अबखायां में उळझायो राखै । इण दीठ सूं देखां तो लगै-टगै सगळा राजस्थानी कवि जथारथवादी कवि है । क्यूं कै बै आपरै सगळै रचना संसार में कठैई भी पाठक नैं आळो-टाळो करतां कै मनोविग्यान री अंवळायां में उळझांवता नीं लखावै । बै सीधी-सपाट नैं आमीं-साम्हीं छाती-ठोक बात करै ।
      जद इतिहास पसवाड़ो फोरै, जुग बदळै तो साहित्य सिरजण में ई लहरां उठै अर आखती-पाखती होवण वाळी इण हलचल कै राग-रोळै सूं साहित्य ई अछूतो कै अलायदो नीं रैय सकै । अैड़ी स्थितियां में नूंवा-नूवां नायक साहित्य री जमीं माथै प्रगटै नैं पसराव लेवै । आं नूंवी हलचलां सूं साहित्य भी उद्वेलित नैं प्रभावित होवै । नित नूंवा परिदृश्य अर रचना फलक आंख्यां साम्हीं खुलै ।  लेखक ई फगत किताबां  मांय सूं उठा’र  कोई कूंत कै नितार आपरी रचना में नीं घाल सकै ।  आ तो जीवण सूं उण री  रागात्मकता अर बंतळ री सगती नैं सिरजण मनगत, अंतस प्रेरणा अर विचारधारा री प्रेरणा री देन होवै ।
रसूल हमजातोव रो रै सबदां कैवां  तो  कविता गुलाब रै बगीचै कै क्यारां में खिलणियां फूल नीं है । वठै तो अै आपणै सैमंुहडै होवै, वांनै ढूंढणा नीं पड़ै । कविता तो उजाड़ मैदानां कै ऊंचै चरागाहां में खिलता फूलां दांई है । जठै हर पग माथै अेक भळै खूबसूरत फूल पावणैं री आस कै लालसा बणी रैवै । विचार अर भावनावां पंछी है, विसय आभो: विचार अर भावनावां हिरण है, विसय जंगळ: विचार अर भावनावां बारहसिंगा है, विसय डीगा डूंगर: विचार अर भावनावां मारग है, विसय नगर - जठीनैं अै मारग ले ज्यावै अर आपस में जा मिळै ।
परिचै, मित्रता, प्यार, नेह अपणायत अबै बगत रै परवाण आपरा अरथ खो रैया है । हर सम्बन्ध री आपरी न्यारी तासीर होवै, न्यारी गैराई होवै पण बगत बायरो इण अरथ-भेद नैं ले बैठ्यो । कह्यो जावै कै जिंदगी में चार चीजां घणी महताऊ होवै- विस्वास, वाचा, रिस्ता अर दिल । अै टूट्यां आवाज तो नीं होवै पण पीड़ अणूंती  होवै । इणी पीड़ कै दरद में राजस्थानी कवि आपरी रचनावां रो आधार ढूंढै । आ ऊण्डी ढूंढ, गैरी दीठ, संवेदना अर ओ खुलो मन-दरसण ही बै आधार है जिका राजस्थानी कविता नैं अेक मुक्कमल ठौड़ माथै घणी ठसक सूं थापित करै अर छीजती मिनख संवेदना धकै कूंत री मांग करै ।
भाई कमलजी ! म्हैं म्हारी बात रो आधार तैयार करण वास्तै सब सूं पैली भाई शिवराज भारतीय री पोथी ‘उजास रा सपना’ में छपी आ कविता ‘ मिनख घट्या-सै’र बध्यो’ आपरी निजर करणी चावूं, जिकी कै संवेदना रै छीजतै रूप नै सहजां ई परकासै ।
सैर बध्यो / गांव घट्या / गुवाड़ घट्या / मेळ घटी / मिलाप घट्यो / अपणायत अर हेज घट्यो /  सै’र बध्यो । मांचा घट्या / मुड्डा घट्या / पिड्डा घट्या / पाटड़ा घट्या / कुर्सी बधी / मेज बधी / सोफा बध्या
बैड बध्यो / सै’र बध्यो  / साफा घट्या / पगड़ी घटी /धोती अर अंगरखी घटी /बेस घट्या/लाज घटी देह रो दिखावो बध्यो/ सै’र बध्यो । खेत घट्या/ दरखत घट्या / करसा घट्या/ कारीगर घट्या / मील बधी /मजूर  बध्या/मैणिया चुगता टाबर बध्या/ सै’र बध्यो । /रीत घटी/ गीत घट्या /प्रीत घटी /मीत घट्या/मिनख घट्या/आबादी बधी/दोगलोपण दुराव बध्यो/ सै’र बध्यो ।
कमल भाई सा ! मिनख री कहाणी भाखरां नैं भांग आग पैदा करणैं री कहाणी है, डूंगरा नैं काट, गेलौ बणावणैं री कहाणी है, चींत री पूठ में उठतै रोळै अर रोवणैं री कहाणी है । आ जीवन जातरा बीज सूं फूल तांई री जातरा है । सरबनास रै पछै धरती माथै घर मांडणैं  री खैचळ जातरा है । दुख सूं दौलड़ीज नैं गोडां बिचै सिर देवणैं री ठौड़ आपरी जड़ां नैं मजबूत करणैं अर कादै में कमल उगावणैं री कहाणी है । राजस्थानी कवि कविता-दर-कविता पाठक नैं ओ ही अैसास करावै अर कविता रा अै पोथी गुलदस्ता कांदै रै छूंतकां दांई परत-दर-परत नूंवा रंग दिखावै । अेड़ौ ई अेक रंग भाई कुमार अजय री पोथी ‘संजीवनी’ री कविता ‘लोग बोळा है’ में देखण नै मिळै -
जावै है जठै तांणी /म्हारो हेलो/ लागै है जाणै/लोग बोळा है । पसरी है पीड़ म्हारी /जिण कांकड़ तांणी /लोग पाथर है/ जखम देंवता पाथर । बीत्योड़ी रात/ जांणै/ भुळावण अर संवेदनावां नै/ खावण नै आयी ही/ अर सगळो / मनखापणो सामट’र/ व्हीर हुयी । कदास ! म्हैं ई पाथर हुय जांवतो/ पाथरां रै सै’र मांय !

      सुवारथ, छळ-प्रपंच, भ्रस्टाचार आज रै  मिनख री सगळी कोमळ-निरमळ संवेदना नैं किचर काढी । अेक साव मिनखैड़ो मिनख इण आपा-धापी में राग, अपणायत अर सम्बन्ध सौ-क्यूंई भूल रैयो है । स्थितियां मिनख नै इण भांत खुद सूं सैंगद कर लियो है कै  जुगां-जुगां सूं भोळप दीठ सूं देखिजणियो मिनख रै  चौफेर झूठ रो राज कायम हुयग्यो है । भाई ओम पुरोहित ‘कागद’ आंख में चितराम भरता ‘झूठ री ओट’ केवै-

सांच कठै
झूठ ई भंवै
चोगड़दै जगती में ।
आत है !
कद सांच है भी तो
कित्ती’क ताळ,
छेकड़ तो
झूठ री ओट में
लुकणो है सांच !’

राजस्थानी कवि जिण सहज भाव, भासा सूं सगळी परम्परा नैं सबदां, चित्रां अर बिम्बां में परोसै, घणौ सुखदायक अर मनभावण लागै । कांई नहीं मिळै आं कवितावां में ? कैलाश कबीर रै सबदां कैवां तो सगळो भारतीय लोक जीवन खूंवै भीज्यौ गमछियो न्हाख्यां अर पाणी री लोटड़ी हाथ में लियां, चीणा चाबतो आपरै विस्वास री धरती माथै चालतो दिखै । आज रा नूवैं जुग-बोध नै आथूणी संस्कृति रा हिमायती भलांई इण नै
Û3Û

पिछड़्यौपण मानै पण आपणी संस्कृति रो मूळ ओ निस्छळ नै निस्पाप लोक जीवन ई है । राजस्थानी  काव्य साधक आपरी संस्कृति नै पल-छिण खातर ई आंख्यां सूं अदीठ नीं होवण देवै । कविता जद तांई आपरी ग्राम्यता, संस्कृति सूं अेक-मेक नीं होवै तद तांई दूजै किणी आंदोलन कै कूका-रोळै रो कोई अरथ नीं होवै । आज बखत भलांई धड़ाबंदी अर घेराबंदी रो होवै पण संस्क्रति अर लोकपथ माथै जीवन सागै चालती, बतळांवती अर गांवती कवितावां ई सामाजिक चेतना रो आधार बण सकै ।
कवि विचारै कै सरकारी योजनावां आपरी बुणगट सूं लेय’ नैं लागू होवणै तांई पूगतां-पूगतां तहस-नहस होय जावै । काळ रै बीखै मरूभौम रै वासिंदां खातर पीवणै रै पाणी री योजनावां ए.सी. री ठण्डक में बैठ बणाईजै अर कई दफै री आं योजना-निरमाण बैठकां में होठां री तिस बादाम रै ज्यूस सूं मिटाईजै । जिका लोग इण योजना-निरमाण सूं जुड़îा होवै, बै न तो कदैई काळ भोग्यो अर न ई कदैई अेक घड़ियै पाणी खातर कोस खण्ड रो पैण्डो करîो, जणै बै योजनाकार मरूभौम री अंवळायां-अबखायां कियां जाणै-समझै ? ओ ही कारण है कै सरकारी स्तर माथै बणनै वाळी घणखरी योजनावां जरूरतमंद तांई जरूत मुजब फायदौ नीं पुगाय  सकै । क्यूं कै योजनाकार संवेदना विहूण मशीन बणग्यो लखावै । जणै ई भाई संजय आचार्य ‘वरूण’ आपरी पोथी ‘मुट्ठी भर उजियाळो’ री कविता ‘म्हनैं जावण दे’ में लिखै-

जावण दे म्हनैं पूठौ
कठैई गूंगी अर बोळी नीं कर देवै
म्हारी संवेदनावां नै
अठै री चीखती जिनगाणी,
कठै मिटा नीं देवै,
म्हारै मन री धड़कन नै,
अठै रो कानफाड़ू दौड़तो-भागतो हाको,
कठै म्हैं भी अेक
मषीन बण’र नीं रैय जावूं
थारै इण मषीनी सै’र मांय ।
बदळतै मूल्यां रै इण रापा-रोळै आम आदमी खुद नैं असहाय, निरुपाय अर बैचारगी रै भंवर पजियोड़ो पावै कमल सा । उण में असुरक्षा री भावना मांय तांई बैठती जाय रैयी है जिकी मिनख री वीरता, निरभयता अर हूंस नैं कुचळ रैयी है अर आठूं पौर, चौबीसूं घण्टा रो अेक डरपाऊ माहौल बणा रैयी है । धरम, संस्कृति, नैतिकता नैं भूल सुवारथी मिनख मिनखपणैं रै खातमै सारू त्यार ऊभा है । आज आखै चौखळै डर, भय, अशान्ति, मारकाट, लड़ाई-झगड़ा अर अनीति रो बोलबालो है । समाज में साम्प्रदायिकता अर जातिवाद रो जहर धुंओ बण पग पसारतो जा रैया है । अैड़ै अंवळै-अबखै बगत में भी कई लोग संवेदनशीलता अर अपणायत भूल राजनीति करै । मिनखपणो भूल, सांग रचै । तद कमलजी, संवेदना री छीज रो कांई आंकोै ? भाई मदन गोपाल लढा आं स्थितियां सूं आंती आय आपरी पोथी ‘म्हारै पंाती री चिंतावा’ री कविता ‘उडीक’ में केवै -

रळ सको तो
अेकामेक हुय जावो
इण मुखौटा आळी भीड़ में
का पछै म्हारै दांई
खींच लेवो मून
इण पतियारै सागै
कै कदैई तो आवैला कोई
म्हारी पीड़ परखणियो
आवै भलांई आभै सूं । ( पृ.20)

भाईजी ! अपणायत अर मोह बै तत्व है जिकां साम्हीं मिनख निबळो अर कमजोर पड़ जावै । नेह अर अपणायत जठै होवै, वठै नफै-नुकसान री कूंत कै इणां रो विचार नीं होवै। पण आज जमानो बदळ रैयो है । अबै आं वास्तै मिनख रै जीवन में कोई जग्यां नीं रैयी है । आज फगत अर फगत सुवारथ पूरीजणो चाहिजै । अपणायत अर रिश्तां धकै ठगीज बगनै होयै मिनख रो कुण धणी धोरी ? सांग तो घणो ई धरम-करम अर पुण्यात्मा रो रचां पण करम साव उन्दा । बोली जमा बारै आना । जणै ई तो कवि सुनील गज्जाणी नै आपरी कविता पोथी ‘ओस री बूंदा’ में भी सन्यासी रो रूप दिखावणो पड़ै -

तीरथ-जातरा कर आयो
म्हारो पड़ौसी
अर सुणांवतो आपरी जातरा कथा
अेक उबाउ नॉवल ज्यूं-
म्हैं वठै माथो टैक्यो,
इत्ता रिपिया दान कर्या,
चारां धामां रा कर लिया दरसण,
अबै बणूलां म्हैं सन्यासी ।
उणी वगत अचाणचक
उण री मां हैलो दियो-
‘बेटा ! हाल, निरा दिन हुया,
म्हनैं ठाकुरजी रा दरसण करावण नैं ले चाल नीं’
-‘ओफ्फो ! रोज-रोज रो ओ झंझट,
म्हारै सूं नीं होवै ओ,
थनै कित्ती बार कैयो है...’
बो जोर सूं मुंहडो तड़कतो उथळो दियो !’

झूठ अर फरेब अबै धरती माथै इत्तौ बधग्यो कै मिनख तो मिनख जीव-जिनावर कै पंखेरू ई इण छळ-छदम सूं आंती आयग्या लागै । अेक आम आदमी ठा नीं कित्ती ई दफै दिन में झूठ बोलै पण अंतस रै उणियारै पछतावै रा कोई भाव नीं उगटै । ठीमरपणौ अर वाचा लारै जान देवणैं रो जमानो तो सा‘व किस्सा कहाणी दांई लागै । मिनख दूजै सूं डरै जिको तो डरै पण अबै तो खुद रै बिडरूप सूं ई घबरावै । भाई प्रमोद          शर्मा ‘बोली तूं सुरतां’  री कविता ‘हांसता लोग’  में मत्तौ-मत्ती ई ढबती हंसी में इणी बिडरूप नै सांमी राखै-
हांसता-हांसता
अचाणचकै चुप क्यूं हो ज्यावै लोग
घणी देर तांई
इकलग क्यूं नीं सकै हांस ।
सोचूं: स्यात हांसता-हांसता दीख जावै
वांनै आपरो ई चै’रो
जिकै नै देखण री
नीं हुवै बां मांय हिम्मत !
    
आज समाज री व्यवस्थावा, विसंगतियां अर विरोधाभास पैलां सूं घणां तीखा हुयग्या है । अेकै कानीं लुगाई आपरी जुगां-जुगां सूं चाली आ रैयी ‘इमेज’ नैं तोड़’र लगै-ठगै सरबनाशी रूप में आगै आंवती दिखै तो दूजी कानीं मध्यमवरग री कस्बाई लुगाई आज भी आपरै जूनै अर पारम्परिक स्वरूप में बदळाव सूं सा’व अछूती, मानतावां अर संस्कारां रो भार ढोंवती कै समझौतां री सलीब माथै टंगी निगै आवै । युवा पीढी रा लिखारा इण चुनौती नैं घणी शिद्दत सूं स्वीकारी है अर मीडिया कै बगत रै अणथक ओपरै दवाबां रै बावजूद साहित्य में आपरी प्रभावी हाजरी मांडी है । श्री देवदास रांकावत इणी अंतस वेदना जिकी कै रिश्तां री छीजती संवेदना नै सांमी लावै, नैं आधार बणाय’र श्री रांकावत आपरी पोथी धोरां धोरां पाळां पाळां री कविता ‘ नूंवो नकोर ब्याव’ में आपरा भाव इण भांत परगट्या है -
इत्तैक में बीनणी आयगी, बा आतां ही बोली-
बजार घूमण जा रैया हो, मेरै कै तोफो ला रैया हो?
म्हैं कैयो- ओ देख ! तोफो तो आयो पड़्यो है पढ लै,
जी तो था मांय अड़्यो है पण बो कुचमादी अदायां खड़îो है ।
बा बोली- पढ जाती तो थां जिसां लारै कोनी आती !
ब्याव थां सूं नीं, किणी होनहार रोजनेता सूं रचाती,
पछै मुख्यमंत्री बण जाती अर थां जिसां पर हुकम चलाती !’

आज रै वैश्वीकरण रै इण दौर में काव्य सिरजण घणौं अबखो काम है कमलजी । सिरजण सारू जोश, जिद्द, जज्बै, जज्बात अर जुनून जेड़ै उपकरणां री घणी जरूत होवै। जिण देश में आज भी आयै दिन गांव-सैर में लाचार-मजबूर लुगायां नैं नागी कर समूचै गांव में घुमाई जावै, बलात्कार अर मान-हीणता रा मुकदमा जठै बरसूं-बरस कचैड्यां में वकीलां री रोटी बण धूड़ खांवता रेवै, दायजै रै नांव पर जठै जींवत लुगाई नैं बाळ दी जावै, अन्धविस्वास रै चूंतरां जठै मिनख री बळी दी जावै, बठै आथूणी नूंवी आधुनिकता अर संरचनावाद जैड़ा वैचारिक बदळाव रो असर समकालीन राजस्थानी कविता में ढूंढणो फालतू अर भोळपणौ है पण छीजती संवेदना री पीड़ रै अैसास री आदत धकै टूटतै नारी मन री संवेदना सूं कवि कियां अळगो रैय सकै ? इणी वास्तै श्री कमल रंगा ‘तिरस री तासीर’  पोथी री कविता ‘प्लीज डोण्ट डिस्टर्ब’ में इण चितराम नैं इण भांत रचै, जिण में पीढी री बदळती सोच अर संस्कारां सूं उपजी पीड़, उण रो छीजतो स्वरूप अर बदळतै वगत रै वायरै नैं अेकै सागै चितारै -

सियाळै री रात
सीरख में मुंहडो ढक्यां
दादोजी गंूथै हा गूंथणा
आपरै बाळपणै रा
करै हा गणमण-
‘धूण्या तापता टाबर
धर मजलां धर कूंचां
चालती कहाणिया
हुंकारा भरता टाबर
कहाणी रा राजा-राणी
जागता रैवता आखी रात....’
इण गत बरडावणो दादै रो
कर्यो डिस्टर्ब
वांरा पोता-पोती रै
मनचावै सीरियल ‘बुगी-बुगी’ में
वां मांय सूं अेक बोल्यो-
‘दादा ! प्लीज डोंट डिस्टर्ब ।’
अर कर दियो वोल्यूम तेज
जिण में दब जावै
दादाजी री वाणी
मर जावै दादाजी रा सुपना ।

भाईसा ! राजस्थानी कवितावां रो मूळ स्त्रोत गांव अर कस्बै रो जीवन, उण री सहजता, सरलता, सौम्यता अर आं नैं लीलण सारू पसराव लेंवती व्यवस्थावां है । गांव रै गुवाड़ में कुलांचा-भरतो भौळपणौ अर सीधौपण है, बित्तौ ही सीधो कविता-विन्यास कै काव्य बुणगट डॉ. मदन गोपाल लढा आपरी कवितावां में अंगेज्यो है  या पछै इयां कैवां कै  कवि आपरी कविता नैं समाज सूं उठा-उठा’र हुवै ज्यूं री त्यूं राखतो गयो है । ‘ऑरिजनलटी’ री आ खास बात कविता दरसण नैं जीवंत करै, जिकी पळ-पळ छीजतै गांवई रूप अर संस्कृति री निश्छलता रै लोप होंवतै रूप री पीड़ नै अंवेरता थकां आपरी कविता ‘उडीकै है पीपळ’ में बसबसीजतै काळजै लिखैै -
पीपळ रै डावै पासै/भंवरियै कुअै माथै/पणिहार्यां री लैण कोनी टूटती । गौर पूजण/ जद गांव री छोर्यां-छापर्यां/पीपळ हेठै भेळी हुय’र/ गीतां रा सुर छेड़ती/उण घड़ी पीपळ रै हिवड़ै/उमाव मावड़तो कोनी । काती में भौरानभोर/ गांव री लुगायां/भजनां भैळी/पैलपोत पीपळ ई सींचती । पण अबै कठै बो कुंभाणो/हणै तो साव उजाड़ है/ओळूं  नै टाळ’र । जमींदोट हुयोड़ा ढूंढा/बिना छात रा आसरा/बिना भींता री बाखळ/माणस बिहूणो बांडो बूचो गांव/ घणो अणखावणो  लागै !’
लूट, हत्या, दंगो-फसाद, आगजनी, निरवासण अर भूखमरी जैड़ी स्थितियां मिनख नैं उदासी अर अेकलपणैं री सुरंग में धकियावण रै साथै ही समूची सिस्टी रै प्रति नकार भाव री प्रवृत्ति नैं जलम देवै पण विचारवान अर दीठवान मिनख घणैं बगत इण ओपरै दावणैं री सरम नीं राखै । छेवट में जद मिनखपणैं रो मूळ भाव जीवटता अर अस्तित्व रच्छा री अंतस चेतना उण नैं चेतावै तो आं सगळी स्थितियां रै बावजूद बो जिण गेलै आगै बधै, बो होवै चुनौती रो अर संघर्ष रो । इण चुनौती भाव सूं आप री सोझी रै तांण बो अंतस कळीजतो श्री श्याम महर्षि री कविता पोथी ‘सोनल बैळू रो समदर’ री कविता ‘आज री ताजा खबर’ री संवेदना रूप प्रगटै-

सुणो-सुणो / आज री ताजा खबर/ रेलगाड़ी पटरी सूं उतरी/ दो मरîा, पांच घायल/ सै’र रै बस अड्डै माथै/ तीन जणां री पैट्यां उतरी/ अेक सूं हाथापाई/ दो री जेबां कतरीजी/ सिनेमा घर रै लारै/ पैट्रोल पम्प सूं/ अस्सी हजार लूंटीज्या/ अजै तांई / कोई नीं पकड़ीज्यो । ठाकुरजी रै मिंदर सांमी/सिंझîा सात बज्यां/ गवाड़ री मीटिंग मांय, पळटूरामजी विधायक बोल्या/जनता मांय ईमानदारी रो प्रचार होवणो चाईजै/ अम्बेडगर सर्किल माथै मंत्रीजी रो भाशण/ षिक्सा मांय सुधार करस्यां/ सुणो-सुणो आज री ताजा खबर/अखबार मांय हैडलाईन/ दूरसंचार मांय देष आतम निर्भर/ काळा आखरां सूं भरîा है अखबार रा पाना/ पण चिमली री इज्जत माथै डाको/ भूरै हरीजन री टूटती सींव/ मोच्यां रै बास मांय पाणी रो तोड़ो/ नीचलै बास मांच बीजळी री लूक मींचणी/ अखबार रा समचार नी बण्या है ओजूं तांई !

राजस्थानी रो थाम थामणिया भाईजी ! बाजारीकरण अर आथूणी संस्कृति सूं जे कोई सब सूं बत्तौ प्रभावित होयो है तो बा है भारत री   नार । अणूंतै अरथ रो लोभ अर बदळतै वगत री पुरवाई उण नैं बैसरम, बेैहया, लालची अर गुनैगार बणा दी  है । घर-परिवार री इज्जत सारू जिकी लुगाई आप री नस उतार दैंवती पण चरित्तर माथै लांछण नीं लागण   दैंवती । सासरै में ऊभी आई, आडी जास्यूं रै सिद्धांत माथै बगत बितांवती लुगाई जिकी रो मुंहडो तो दूर, नख ई कदै कोई पाड़ौसी नीं देख सकता, बा ही आज बदळाव रै हींडै झूमै । तद ई तो शिवराज भारतीय लिखै-
बै मायां डाकण बणी,
बाप कसाई जाण
गरभ मांय नुचवाय दै
बाळकड़ी रा प्राण !

बीजै जिको ही काटै अर खावै री मानता अबै घणी पुराणी होयगी । आज आस्था अर विस्वास री जग्यां भय अर लोभ आ बिराज्या है । हद तो आ है कै भगवान ई मिंदर छोड़’र पम्पलेट में औतार लैवण लागग्या । मैनेजमेंट रो ओ कन्टंेट मिनख री रही-सही आस्था, विस्वास, संवेदना नैं खतम कर न्हाखी । गूंजै री गरमी सारू होंवता अै कारनामां कद तांई निभैला ? अेकै कानीं मिनख आस्था रो अैसास दिरावण सारू पैदल जातरा करै पण जिण देव री आस्था परकासै, उणां रा गुण-भाव अंगै ई नीं लखावै । निशान्तजी आपरी पोथी ‘धंवर पछै सूरज’ री कविता ‘रामदेवजी’ में इण भाव नैं ‘ इण भांत अंवेरîो है -

करो हो रूणीचै तांई जातरा
जगावो हो जम्मा,
राखो हो थैई
पण थे ई रामदेवजी दांई
कदै किणी राकस नै ललकारîो है?
लगाया है अछूता नै गळै,
करी है कीं रोगी-दोखी री सेवा ?

मिनख री तागत अकूंत होवै कमल भाईसा । बो जे आपै अर चेतै मांय होवै तो न तो उण नैं कोई हरा सकै, न लूट सकै । बो हारै तो फगत आप रै जोर सूं कै अपणायत धकै होयै धोखै सूं । आज रै बगत में घणौ संकट छळ-कपट रो है । मिनख मिनख नैं ठगै । मिनख ठगीजै तो फगत प्रेम अर नेह री दीठ । डरै तो फगत संसारू इज्जत सूं । काळजै री इणी पीड़ अर कण्ठां मांय अबोल मूसीजती-छीजती अर पसरती  संवेदना री सबळी लैरां पाठक रै ऊण्डै अंतस उतर बंतळ करती मंगत बादळ री  ‘मीरां’ पोथी री अै ओळियां समूचै संवेदना फलक रो खुलासो करती लखावै-

‘जुगां-जुगांतरां सूं भटकती
आंख्यां में तास, आस हियै में
Û8Û
डार सूं अळगी तिसां मरती मरगी
अधरां पर अटक्योड़ी अेक गूंगी प्रार्थना
गुमग्या जिण रा सबद, बा फरियाद
अेक निरव कंवळी राग
नीं समझ सक्यो जिण नैं कोई
कण्ठा भीतर घुट-घुट रैयगी जिकी
मुधरी-मुधरी कसक लियां
बादळां री छियां रो ठण्डो
हिवड़ै में पळतो
सीप में जियां मोती
भोळो उज्ज्वळ उरणियै सरीखो
अणचीन्हो अनुराग संस्कारां री परतां तळै
सूतो हो कठैई सागर री गैराई में !

कमलजी !
वैश्विक जीवन-दीठ, बदळतै मूल्यां रो अैसास अर सामाजिक बिडरूप नै स्थितियां धकै छीजतो संवेदना पख राजस्थानी कवि री संवेदना री जाग बणै । । भाव, भावना कै संवेदना रै बिना मिनख सा’व गूंगो  होवै । संवेदना मिनख रै वजूद री पिछाण होवै । संवेदना मन री अतळ गैरायां कै मिनख रै इहलोक, परलोक नै त्रिलोक रो ग्यान होवै अर ओ ग्यान जद समाज रै साम्हीं आवै तो अभिव्यक्ति गिणीजै । आखै देस - समाज में इस्यो कोई जीव-जिनावर कै मिनख नीं है, जिण रै कै मन में संवेदना नीं होवै । क्यूं कै जे किणी सजीव देही में भाव, विचार कै चींत री चेतना कै सोचण-समझण री सामरथ नीं होवै तो पछै सजीव अर निरजीव में कोई भेद नीं रेवै । इण विचार रै धकै कैय सकां कै मन री उडार भावनावां, सुख-दुख री चींत, पीड़ रो अैसास अर चोखै-माड़ै री पिछाण जीवन-सगती सूं जीव नैं होवै बा उण री संवेदना ही  होवै । इण संवेदना रो सार्वजनीकरण कै दूजां सूं साझौ इण रै अभिव्यक्ति रूप नैं परगटै ।
भाईसा ! घणा ई कलमधणी है, जिका समाज री छीजती संवेदना री छीज नै अठै ई ढाबण सारू खैचळ कर रैया है । जद इक्कीसवैं सईकै धकै बात करां तो श्री सत्यनारायण इन्दौरिया, रतन राहगीर, नीरज दइया, जुगल किशोर पुरोहित, सीताराम महर्षि, राजेन्द्र स्वर्णकार, नथगिरी भारती, जोगासिंह, गौरीशंकर मधुकर, पं. राधेश्याम जोशी, सतीश छिम्पा, रामकुमार घोटड़, मणिकांत सोनी, विश्वनाथ भाटी, योगेश कानवा, संतोष माया मोहन, रामस्वरूप किसान जैड़ा कित्ता ई कवि है जिका मिनख मन री छीजती संवेदना नै समूची तागत अर शिद्दत सूं अंवेरनै अर चितरावणै में लागयोड़ा है । म्हारो तो रूं-रूं वां नै निवण करै ।
भाईजी ! छेवट में आ ई कैय सकां कै इक्कीसवैं सईकै री राजस्थानी कविता में संवेदना रो उत्ताल स्वरूप निगै आवै । पूरी मजबूती सूं इण संवेदना री अभिव्यक्ति पाठक नैं मानसिक स्तर माथै खुद सूं अेकाकार कर  लेवै । अभिव्यक्ति रो ओ सबळो पख मिल्यां पछै लेखक अर पाठक री संवेदना में कोई भेद कै आंतरोपण नीं  रेवै ।  पाठक बा ई सोचै, देखै, विचारै अर चितारै जिकी कै लेखक भाव रूप में उण नैं सूंपै ।
कैयो जावै कै किणी रै करमां मांय ई कांकरा हुवै तो उण रै कोई कारी नीं लागै । संवेदना नै सागर रूप आपरै काळजै उतार सबदां में रचणिया अेक अैड़ा कवि आपणै साथै है, जिका फगत संवेदना री चितार तांण आखै देश में आपरी निरवाळी पिछाण बणाई है ! हां भाईसा ! म्हैं बात कर रैयो हूं मोहनजी आलोक री । पण म्हैं कांई करूं, करमां रो लिख्यो कुण मेटै ? म्हारै कनैं वांरी घणी ई कवितावां निजराणै रूप है पण अठै आपरै
Û9Û

आदेश मुजब वांरी छपी थकी पोथी ‘चिड़ी री बोली लिखो’ री सींव है । म्हैं घणो ई माथो मारîो इण पोथी सारू, पण जुगत नीं हुई । वांरा खासमखास भाई नीरज दईया अर प्रमोद शर्माजी सूं ई इण पोथी सारू हाथा-जोड़ी करी, पण बै ई हाथ झड़का दिया । भाई मालचंदजी तिवाड़ी धीजो बंधायो कै म्हैं पोथी भिजवाय दैस्यूं पण करमां रै कारी नीं लागी । छेवट मजबूरी में म्हैं इंटरनेट रो सहारो लियो तो मूळ तो नीं पण इण पोथी री अेक कविता रो हिन्दी उथळो म्हनैं मिलग्यो ।  कमलजी, समाज आपरै ढब बेवै, उण नै आपणै रोवणै सूं अर इण संवेदना सूं
कोई लेवणो-दैवणो नीं है । क्यूं कै आपां चाहै कित्तौ ई बढिया लिखता हुवांला पण आपणो लिखियोड़ो ओजंू समाज रै सुख-दुःख रो हिस्सो नीं बण पा रैयो है । ओ ई कारण है कै समाज आपरै हाल में मस्त है पण आपां उण री दशा देख-देख रो रैया हां, कुरळाय रैया हां । मोहनजी आलोक कैवै ज्यूं ओ रोवणो ई शायद आपणी नियति है-

रो भाई रो
लगातार रो
जैसे कि हम रो रहे हैं
रात को, दिन को
अंधेरे को, उजाले को
गर्मी को, पाले को
अमीय को, विष को
तृप्ति को, तृष्णा को
रो
कि रोना ही अपनी नियतिहै
रो
कि इस रोने में ही
मनुष्यता की गति है

रो !
कवि रो !!
कि तुम्हारे रोने में
और आम आदमी के रोने में
बहुत फर्क है

रो !
कवि रो !!
कि तुम्हारे रोने से ही सुरक्षित है
आने वाली पीढियों का हर्ष ।

भाई कमलजी, थांरी म्हारी बातां अर जगत री अटकळ रै अंकोड़ियां रो कांई निवैड़ो । भळै कदैई मिल-बैठ’र करस्यां । बाबूजी, भाभीजी अर घर में सगळां नै सादर जथाजोग कैयीज्यो । छीजती संवेदना धकै ई सही पण संवेदना तो दिखाई ई है, इण सारू महेन्द्रजी खड़गावत साहब नै अर पृथ्वीराजजी रतनू नै ई सात सिलाम दीज्यो ।
थांरो ई
छीजती संवेदना वाळो 
रूळियार
 

5 टिप्‍पणियां:

  1. बधाई अर साधुवाद ! आप री मिणत सरावणै जोग है...

    उत्तर देंहटाएं
  2. आच्‍छी बात तो आ है कै ब्‍लॉग माथै छीजती पोस्‍ट रो टंटो इण बहानै कीं मिटयो है। कद सूं बसंत पंचमी आयी बैठी ही भाई साहब।

    सांतरो परचो। लखदाद।

    उत्तर देंहटाएं
  3. दुलाराम जी री बात साव सांची. ब्लोग री संवेदना तो बची.
    परचो सागीड़ो है. हियै तणी बधाई. बीकानेर संभाग री समकालीन राजस्थानी कविता री फ़िरोळ में कोई कमी कोनी पण अबै आखी राजस्थानी कविता नै ई जांचो-परखो.

    उत्तर देंहटाएं

जगजाहिर